Zbulohet logoja e EuroLeague Final Four 2026 në Athinë

EuroLeague ka zbuluar identitetin vizual për Final Four 2026, duke gërshetuar trashëgiminë e lashtë greke me intensitetin modern të fushës së lojës.

Logoja, e prezantuar nga partneri kryesor Etihad, është e pasur me simbolika që nderojnë historinë e qytetit pritës.

​Në qendër të dizajnit qëndron trofeu i EuroLeague, i mbështetur mbi një kolonë të stilit dorik, si një vlerësim për trashëgiminë arkitekturore të Greqisë.

Ky ansambël rrethohet nga një mburojë rrethore në formën e topit të basketbollit, e cila është e stolisur me katër degë ulliri, transmeton Klankosova.tv.

Këto degë përfaqësojnë jo vetëm katër ekipet finaliste, por edhe legjendën e perëndeshës Athina, e cila fitoi të drejtën për t’i dhënë emrin qytetit pikërisht përmes pemës së ullirit.

​Sfondi i logos përbëhet nga një dizajn i frymëzuar nga mozaikët tradicionalë, duke simbolizuar qëndrueshmërinë dhe inovacionin e basketbollit evropian.

Edhe paleta e ngjyrave mbart kuptime të veçanta: kalimi nga “ngjyra e gurit” dhe grija metalike te “e arta e kampionit” evokon madhështinë e antikitetit dhe prestigjin e fitores.
Ndërkohë, e kaltra e thellë e Mesdheut dhe portokallia e zjarrtë e EuroLeague bashkohen për të kapur energjinë dhe shpirtin e lojës.

​Ky identitet vizual do të shoqërojë rrugëtimin e tifozëve deri më 24 maj, kur një emër i ri do të gdhendet në historinë e kampionëve në zemër të Athinës.

“Final Four” këtë vit zhvillohet në arenën “OAKA” në Athinë, me gjysmëfinalet që zhvillohen më 22 maj në dy termine (18:00 dhe 21:00), kurse finalja më 24 maj.

Të gjitha ndeshjet, publiku i Kosovës do të ketë mundësinë t’i përcjell përmes kanaleve të sportit në ArtMotion. /Klankosova.tv