Newcastle i tregon “derën” Woltemades

Newcastle United po shqyrton mundësinë e shitjes së sulmuesit Nick Woltemade vetëm një vit pas transferimit të tij, pas një periudhe me paraqitje që nuk kanë përmbushur pritjet e klubit.

Sulmuesi gjerman ka pasur vështirësi për të gjetur formën optimale dhe ka humbur gradualisht vendin në formacionin bazë, duke bërë që drejtuesit e klubit të rishikojnë të ardhmen e tij.

Sipas mediave angleze, situata e Woltemade ka tërhequr vëmendjen e disa klubeve të Premier League, ku ndër më të interesuarit për shërbimet e tij është Aston Villa, transmeton Klankosova.tv.

Klubi nga Birmingham raportohet se është i gatshëm të ofrojë rreth 57 milionë euro për të siguruar transferimin e sulmuesit gjatë afatit kalimtar veror.

Në Newcastle, vendimi përfundimtar pritet të merret në muajt e verës, ku bordi do të vlerësojë ofertat e mundshme dhe planin sportiv për sezonin e ardhshëm.

Woltemade u transferua me pritshmëri të larta, por mungesa e vazhdimësisë dhe konkurrenca në repartin ofensiv kanë ndikuar në minutazhin dhe ndikimin e tij në skuadër.