Sulmet ajrore ruse vrasin tre persona në Kiev dhe Mykolaiv

Sulmet me raketa ruse goditën Kievin dhe qytete të tjera të mërkurën në mëngjes, duke shkaktuar të paktën një vdekje dhe disa të plagosur, njoftuan autoritetet ukrainase.

Kryetari i bashkisë së Kievit, Vitali Klitschko tha se një raketë ruse e rrëzuar kishte dëmtuar linjat e energjisë elektrike dhe se disa familje në qytet ishin pa energji elektrike.

Një burrë u raportua të jetë vrarë në qytetin lindor të Mykolaivit.

I gjithë vendi u vu nën alarm ajror rreth orës 06:00 të mëngjesit të sotëm, transmeton Klankosova.tv

Kryebashkiaku Klitschko tha se nëntë persona ishin plagosur në kryeqytet, duke përfshirë një grua shtatzënë.

Në Mykolaiv, një person i cili u dërgua në spital vdiq më vonë nga plagët e marra, tha kryetari i bashkisë së qytetit, Oleksandr Senkevich, raporton BBC.

Të tjerët u trajtuan në vendin e ngjarjes pas sulmit, i cili dëmtoi shtëpitë, si dhe furnizimet me gaz dhe ujë, shtoi ai.

Shpërthime u dëgjuan gjithashtu në Kharkiv, me disa dëme në infrastrukturë të raportuara nga autoritetet ushtarake.

Sipas forcave ajrore ukrainase, raketat ruse të lundrimit u zbuluan duke manovruar mbi rajonet perëndimore të Lviv, Ternopil dhe Ivano-Frankivsk, transmeton Klankosova.tv.

Ukraina është nën sulm të shpeshtë ajror që kur Rusia e pushtoi më 24 shkurt 2022. Forcat ruse përdorin rregullisht lloje të ndryshme armësh në sulmet e tyre, duke përfshirë dronët dhe raketat.