Pandemia e ardhshme ka të ngjarë të shkaktohet nga gripi, paralajmërojnë shkencëtarët

Sipas shkencëtarëve kryesorë, gripi është patogjeni që ka më shumë gjasa të shkaktojë një pandemi të re në të ardhmen e afërt.

Një studim ndërkombëtar, që do të publikohet fundjavën e ardhshme, do të zbulojë se 57 për qind e ekspertëve të lartë të sëmundjeve tani mendojnë se një lloj virusi i gripit do të jetë shkaku i shpërthimit të ardhshëm global të sëmundjes vdekjeprurëse infektive, raporton The Guardian, transmeton Klankosova.tv.

Besimi se gripi është kërcënimi më i madh pandemik në botë bazohet në hulumtimet afatgjata që tregojnë se ai po evoluon vazhdimisht dhe po ndryshon, tha Jon Salmanton-Garcia i Universitetit të Këlnit, i cili kreu studimin.