Kryeministri i Haitit jep dorëheqje pasi rendi dhe ligji rrëzohen

Kryeministri i Haitit, Ariel Henry, ka rënë dakord të japë dorëheqje pas javëve të presionit në rritje dhe dhunës në rritje në vend.

Kjo vjen pasi krerët rajonalë u takuan në Xhamajka të hënën për të diskutuar një tranzicion politik në Haiti, raporton BBC, transmeton Klan Kosova.

Henry aktualisht është i bllokuar në Porto Riko pasi u pengua nga bandat e armatosura të kthehej në shtëpi.

Në një video adresim që njoftonte dorëheqjen e tij, Henry u kërkoi Haitianëve të qëndronin të qetë.

“Qeveria që unë drejtoj do të japë dorëheqjen menjëherë pas instalimit të një këshilli [tranzicioni],” tha  Henry.

“Dua të falënderoj popullin Haitian për mundësinë që më është dhënë. Unë po u kërkoj të gjithë haitianëve të qëndrojnë të qetë dhe të bëjnë gjithçka që munden që paqja dhe stabiliteti të kthehen sa më shpejt që të jetë e mundur”.

Henry, i cili kishte udhëhequr vendin në një bazë të përkohshme që nga korriku 2021 pas vrasjes së ish-presidentit Jovenel Moïse, i kishte shtyrë vazhdimisht zgjedhjet, duke thënë se së pari duhet të rivendoset siguria.

Banda të armatosura rëndë kanë kontrolluar rrugët e kryeqytetit të Haitit, Port-au-Prince ditët e fundit, duke kërkuar dorëheqjen e kryeministrit të pazgjedhur.

Port-au-Prince dhe rajoni përreth janë nën një gjendje të jashtëzakonshme njëmujore, ndërsa një shtetrrethimi është zgjatur.

Henry kishte qenë në Kenia për të nënshkruar marrëveshje për vendosjen e një force ndërkombëtare të sigurisë për të ndihmuar në trajtimin e dhunës kur një koalicion bandash sulmoi stacionet e policisë dhe sulmoi dy nga burgjet më të mëdha të Haitit.

Një aeroplan që transportonte Henryn, u ndalua të ulej pas sulmeve të vazhdueshme në aeroportin ndërkombëtar të Haitit.

Prej disa ditësh pritet dorëheqja e tij. Grupi Caricom i kombeve të Karaibeve e kishte bërë të qartë qëndrimin e tij se ai shihej si një pengesë për stabilitetin e Haitit dhe se do të duhej të tërhiqej në mënyrë që të mund të fillonte kalimi në një këshill kalimtar.

Shtëpia e Bardhë fillimisht kishte dashur të shihte Henryn të kthehej në Haiti për të mbikëqyrur procesin e tranzicionit, por egërsia e luftimeve në vend ndryshoi mendje në Uashington ditët e fundit.

Pa mbështetjen e as të Departamentit të Shtetit të SHBA-së dhe as të fqinjëve të tij, ishte e qartë se Henry nuk kishte alternativë tjetër veçse të tërhiqej.

Henry ka shprehur dëshirën për t’u kthyer në Haiti, por situata e sigurisë duhet të përmirësohet përpara se ai të jetë në gjendje ta bëjë këtë, sipas SHBA-së që ishte në bisedimet në Kingston të hënën.