Harris thotë se ndihma duhet të rritet përpara çdo operacioni ushtarak në Rafah

Shtetet e Bashkuara të Amerikës i kanë kërkuar Izraelit të zbatojë një “plan të besueshëm humanitar” përpara se të shqyrtojë një fushatë ushtarake në Rafah në Gazën jugore.

Zëvendëspresidentja, Kamala Harris ka zhvilluar bisedime me Benny Gantz, një anëtar i kabinetit të luftës izraelite, raporton Sky News, transmeton Klankosova.tv.

“Zëvendëspresidentja dhe ministri Gantz diskutuan situatën në Rafah dhe nevojën për një plan humanitar të besueshëm dhe të zbatueshëm përpara se të mendohet për ndonjë operacion të madh ushtarak atje, duke pasur parasysh rreziqet për civilët”, tha Shtëpia e Bardhë në një deklaratë.

“Ajo i kërkoi Izraelit të marrë masa shtesë në bashkëpunim me Shtetet e Bashkuara dhe partnerët ndërkombëtarë për të rritur rrjedhën e ndihmës humanitare në Gaza dhe për të siguruar shpërndarjen e saj të sigurt për ata që kanë nevojë”, thuhet më tutje në deklaratë.

Më herët, Harris tha se duhet të ketë një “armëpushim të menjëhershëm” në Gaza.

Ajo gjithashtu i bëri thirrje qeverisë izraelite që të bëjë më shumë për të rritur fluksin e ndihmës pa justifikime.

Ajo tha se një armëpushim gjashtë-javor do të nxirrte pengjet izraelitë dhe do të merrte një sasi të konsiderueshme ndihme në rajon.