Aktivisti rus i të drejtave të njeriut dënohet me burg për “diskreditim të luftës”

Një nga aktivistët më jetëgjatë dhe më të respektuar të të drejtave të njeriut në Rusi, Oleg Orlov, është dënuar me dy vjet e gjysmë burg për diskreditimin e luftës në Ukrainë.

Orlov, i cili është 70 vjeç, ka shërbyer për më shumë se dy dekada si një nga drejtuesit e organizatës për të drejtat e njeriut Memorial, e cila fitoi një pjesë të çmimit Nobel për paqe në vitin 2022, një vit pasi u ndalua në Rusi.

Ai u akuzua nga prokurorët rusë për “diskreditim” të ushtrisë ruse në një artikull në mediat franceze, ku ai shkruante se trupat ruse po kryenin “vrasje masive” në Ukrainë dhe se vendi i tij “kishte rrëshqitur përsëri në totalitarizëm”.

Duke folur me gjykatësin dhe prokurorin, Orlov tha: “A nuk është e frikshme të shikosh se në çfarë po shndërrohet vendi ynë, të cilin ndoshta edhe ju e doni? A nuk është e frikshme që në këtë absurditet, në këtë distopi, ndoshta nuk do të duhet të jetoni vetëm ju dhe fëmijët tuaj, por edhe, Zoti na ruajt, nipërit e mbesat tuaja?”, raporton The Guardian, transmeton Klankosova.tv.

Gjykata e Lartë e Rusisë urdhëroi mbylljen e Memorialit në vitin 2021, në atë që shumë e panë si një moment vendimtar në goditjen e mendimit të pavarur nga presidenti rus Vladimir Putin. /Klankosova.tv