Cila është gjëja më e mirë për të pirë në këtë vapë: Ujë, izotonikë, elektrolite…?

Alarmet për mot të nxehtë janë lëshuar për shkak të kulmit të valës së të nxehtit, ndërsa qytetarëve, veçanërisht grupeve të ndjeshme, u rekomandohet të qëndrojnë në ambiente të freskëta dhe të kujdesen për hidratimin.

Ekspertët theksojnë se në temperatura të larta është shumë e rëndësishme zëvendësimi i lëngjeve dhe elektroliteve që humben përmes djersitjes.

 Uji mbetet zgjedhja kryesore, ndërsa këshillohet pirja e tij në mënyrë të shpeshtë, edhe kur nuk ndihet etje.

Përveç ujit, rekomandohen edhe pijet që ndihmojnë në rikthimin e elektroliteve, si uji i kokosit dhe pijet izotonike, të cilat përmbajnë natrium, kalium dhe magnez. Megjithatë, ekspertët këshillojnë kujdes me pijet sportive për shkak të përmbajtjes së sheqerit.

Gjithashtu, mund të konsumohen çajra bimorë të ftohtë pa kafeinë, si kamomili apo menteja, si dhe lëngje natyrale pa sheqer të shtuar, sidomos nga fruta dhe perime me përmbajtje të lartë uji si shalqiri, kastraveci dhe portokalli, shkruan Index, transmeton Klankosova.tv.

Ekspertët paralajmërojnë se konsumimi i alkoolit në mot të nxehtë nuk rekomandohet, pasi rrit dehidratimin dhe ndikon në aftësinë e trupit për të rregulluar temperaturën. Po ashtu, pijet me kafeinë dhe pijet shumë të ëmbla mund të përkeqësojnë humbjen e lëngjeve dhe të ndikojnë në cilësinë e gjumit.

Edhe ushqimet si akullorja dhe kafeja e ftohtë duhet të konsumohen me masë, për shkak të përmbajtjes së lartë të sheqerit dhe ndikimit në dehidratim.

Sipas ekspertëve, gjatë verës rekomandohet një dietë e lehtë dhe e bazuar në stilin mesdhetar, me ushqime të freskëta që ndihmojnë trupin të përballojë më lehtë temperaturat e larta.