Autobusi shpërthen në Brazil pasi përplaset me kamionin, mbi 30 viktima

Një aksident i rëndë ka ndodhur herët të shtunën në Brazil, ku një autobus i mbushur me pasagjerë u përplas me një kamion dhe shpërtheu në flakë, duke shkaktuar më shumë se 30 viktima, sipas raporteve nga departamenti i zjarrfikësve.

Aksidenti ndodhi në një autostradë kryesore pranë qytetit Teofilo Otoni, në shtetin Minas Gerais.

Pas largimit të trupave të pajetë, zjarrfikësit njoftuan se nga 45 pasagjerët që ndodheshin në autobus, 38 prej tyre, përfshirë edhe shoferin e autobusit, ishin konfirmuar të vdekur.

Të tjerët që ishin në autobus ndodhen në gjendje të rëndë dhe janë transportuar në spitalin lokal, raporton Reuters, transmeton Klankosova.tv.

Shoferi i kamionit u largua nga vendi i aksidentit, ndërsa tre pasagjerë të një makine, e cila u përplas me kamionin dhe u bllokua nën të, arritën të mbijetonin.

Një hetim për të përcaktuar shkakun e aksidentit është në zhvillim e sipër, pasi janë mbledhur dëshmi të ndryshme nga dëshmitarët, tha departamenti i zjarrfikësve.

Fillimisht, zjarrfikësit njoftuan se aksidenti mund të ketë ndodhur për shkak të një defekti në gomat e autobusit, që e ka bërë shoferin të humbasë kontrollin, përpara se të përplasej rreth orës 4:00 të mëngjesit, me kamionin që vinte nga drejtimi i kundërt.