Tajfuni vdekjeprurës “Ragasa” godet bregdetin e dendur të Kinës së Jugut

Tajfuni i fuqishëm “Ragasa” goditi bregdetin e Kinës së Jugut, duke sjellë erëra të fuqishme dhe reshje të dendura shiu në qytete të mëdha si Hong Kong dhe Shenzhen.

Ky tajfun kishte shkaktuar më parë përmbytje fatale në Tajvan, ku kanë humbur jetën 14 persona dhe mbi 120 të tjerë janë ende të zhdukur.

Në Tajvan, një liqen në rajonin lindor të Hualienit u përmbyt, duke shkaktuar përmbytje të mëdha dhe duke marrë jetën e të paktën 12 personave. Shpëtimtarët janë duke kërkuar për më shumë se njëqind persona të zhdukur.

Në Hong Kong, erërat arritën shpejtësi deri në 168 kilometra në orë, duke rrëzuar pemë dhe duke dëmtuar skelat e ndërtesave.

Për shkak të rrezikut, Hong Kong dhe Makao kanë nxjerrë sinjalin më të lartë të paralajmërimit për uragan. Shkollat, bizneset dhe transporti publik janë mbyllur. Sipas observatorit meteorologjik, dallgët mund të arrijnë deri në katër metra lartësi në disa zona.

Në provincën Guangdong të Kinës, mbi një milion banorë janë evakuuar si masë paraprake. Mbi 10,000 anije janë zhvendosur në zona të sigurta, ndërsa mbi 38,000 zjarrfikës janë në gatishmëri.

Ky vit ka qenë veçanërisht i stuhishëm për Hong Kongun, me nëntë tajfune të regjistruar deri tani, më shumë se mesatarja vjetore prej gjashtë tajfuneve, shkruan CNN, transmeton Klankosova.tv.