Sekretari amerikan i mbrojtjes viziton Kievin

Sekretari amerikan i Mbrojtjes, Lloyd Austin, ka arritur të hënën për një vizitë në Kiev.

Ai e bëri të ditur lajmin në platformën e mediave sociale X.

“Unë jam këtu sot për të dhënë një mesazh të rëndësishëm, Shtetet e Bashkuara do të vazhdojnë të qëndrojnë me Ukrainën në luftën e tyre për liri kundër agresionit të Rusisë, si tani ashtu edhe në të ardhmen”, tha ai.

Vizita vjen në kohën e rritjes së ndasive mbi ndihmën ndaj Ukrainës në legjislaturën e SHBA-së. Një konferencë e përbashkët e industrisë ushtarake Ukrainë-SHBA në Uashington do të mbahet muajin e ardhshëm, raporton Guardian, transmeton Klankosova.tv.

Kjo ngjarje, që do të mbahet më 6-7 dhjetor, synon të nxisë prodhimin vendas të armëve të Ukrainës, ndërsa lufta e saj kundër një pushtimi rus në shkallë të plotë i afrohet kufirit dyvjeçar.