Pse u rritën çmimet e biletave të autobusëve në Prishtinë? Flet drejtori (VIDEO)

Udhëtarët që përdorin transportin publik në Prishtinë, që nga dje, janë përballur me rritje të çmimeve të biletave ditore dhe javore.

Lidhur me këtë vendim ka folur drejtori i mobilitetit në Komunën e Prishtinës, Pëllumb Bajqinovci, në emisionin “Ora 7”, ku ka sqaruar arsyet e ngritjes së çmimeve dhe ndryshimet që po ndodhin në sistemin e transportit urban.

“Atëherë jemi para një situate ku kemi ngritjen e çmimit realisht të biletës ditore, javore dhe atyre dy biletave që i kemi ne në përdorim për qytetarët e kryeqytetit. Transporti urban në përgjithësi ka kaluar në një fazë të rivitalizimit komplet të linjave”, tha Bajqinovci.

Siç tha ai, transporti urban dhe ai privat janë pjesë e sistemit të transportit të Prishtinës, i cili po kalon në një fazë modernizimi.

“Me revitalizimin e sistemit është kërkuar ndryshimi i autobusëve. Po kërkojmë autobusë të rinj, më të qasshëm dhe më efikas për qytetarët. Ato janë në proces blerjeje dhe pajisjeje, i cili do të përfundojë brenda vitit”, ka deklaruar ai.

Bajqinovci ka theksuar se paralelisht po zhvillohet edhe procesi i digjitalizimit, që sipas tij do të ndihmojë në mbledhjen e të dhënave për përdorimin e linjave.

“Për ne është shumë e rëndësishme kuleta digjitale si mjet që krijon të dhëna. Përmes saj do të shohim cilat linja janë më të ngarkuara dhe më të kërkuara. Kjo është edhe arsyeja e kësaj ngritjeje të vogël të çmimeve”, ka deklaruar mes tjerash Bajqinovci në Klan Kosova.

Ndiqni deklarimin e plotë: