Përplasen me kamionçinë nga 11-vjeçari, vdesin tetë murgj në Tajlandë 

Tetë murgj budistë u vranë dhe më shumë se 20 të tjerë u plagosën pasi u goditën nga një kamionçinë e drejtuar nga një djalë 11-vjeçar ndërsa ishin në një pelegrinazh në provincën verilindore të Mukdahanit në Tajlandë, thanë zyrtarët të enjten.

Viktimat ishin pjesë e një grupi prej 34 murgjsh budistë dhe pesë besimtarësh laikë që kryenin një pelegrinazh nga një tempull në provincën Mukdahan në një tjetër në provincën fqinje Ubon Ratchathani, tha Guvernatori i Mukdahanit Vorayan Bunarat në një konferencë për shtyp, raporton Reuters, transmeton Klankosova.tv.

Pesë murgj vdiqën në vendngjarje, ndërsa tre të tjerë më vonë vdiqën nga plagët e marra në spital, tha guvernatori. 22 murgj të tjerë dhe një laik u plagosën në aksident, përfshirë katër që tani janë në gjendje kritike.

“Shoferi, një djalë 11-vjeçar me nevoja të veçanta, mori kamionçinën nga shtëpia e familjes së tij dhe ngau rreth 10 km) përpara se të godiste grupin e murgjve”, tha Gjeneral Major Pairoj Thaiphutra, shefi i policisë së provincës Mukdahan.

Policia nuk ka ngritur asnjë akuzë pasi hetuesit ende po përpiqen të përcaktojnë rrethanat e aksidentit, tha Pairoj.