Komentatori që çmendi Anglinë para 45 vitesh, historia e rivalitetit me Norvegjinë

Anglia dhe Norvegjia do të përballen në një ndeshje të madhe, në çerekfinalet e Kupës së Botës 2026 në Miami, por rivaliteti mes dy skuadrave lidhet më shumë me një moment legjendar të komentimit sportiv sesa me historinë e dueleve në fushë.

Plot 45 vite më parë, një komentator norvegjez i quajtur Bjorge Lillelien krijoi një nga momentet më të paharrueshme në historinë e futbollit, raporton BBC, transmeton Klankosova.tv

Në shtatorin e vitit 1981, Norvegjia, e cila atëherë nuk konsiderohej një fuqi e madhe futbolli, shkaktoi një nga surprizat më të mëdha duke mposhtur Anglinë 2-1 në një ballafaqim kualifikues për Kupën e Botës.

Anglia e asaj kohe kishte një kombëtare e mbushur me yje si Bryan Robson, Glenn Hoddle, Kevin Keegan dhe Trevor Francis. Humbja në stadiumin “Ullevaal” në Oslo u konsiderua një tronditje e madhe dhe një nga momentet më të vështira për futbollin anglez.

Pas vërshëllimës së fundit, komentatori i radios norvegjeze NRK, Bjorge Lillelien, shpërtheu në një komentim emocional që do të mbetej përgjithmonë në histori, transmeton Klankosova.tv

Ai nisi duke përmendur figura të mëdha britanike si Lord Nelson, Winston Churchill, Margaret Thatcher dhe sportistë të famshëm, përpara se të drejtohej drejtpërdrejt ndaj kryeministres së atëhershme britanike.

“Margaret Thatcher, a më dëgjon? Kemi një mesazh për ty. Ne i kemi nxjerrë djemtë e tu jashtë Kupës së Botës. Djemtë tuaj morën një goditje të jashtëzakonshme.”

Edhe pse Anglia më pas u kualifikua për Kupën e Botës 1982 në Spanjë, pavarësisht deklaratës së tij, fjalët e Lillelien mbetën të skalitura në historinë e futbollit.

Komentatori norvegjez, i cili vdiq në vitin 1987 në moshën 60-vjeçare, gjithmonë këmbënguli se fjalimi i tij ishte spontan dhe jo i përgatitur paraprakisht. /Klankosova.tv