Klubi italian merr vendimin: Ndalohen goditjet me kokë te fëmijët

Como ka marrë një vendim të rëndësishëm që mund të aplikohet më shpesh në futboll. Klubi italian ka ndaluar goditjet e topit me kokë, nga ekipet e të rinjve.

Ky vendim revolucionar vjen me qëllim parandalimin e dëmtimeve neurologjike dhe mbrojtjen e shëndetit të lojtarëve në periudhë afatgjatë.

Sipas udhëzimeve të reja të akademisë, vëmendja e fëmijëve do të përqendrohet te kontrolli i topit, marrja e vendimeve dhe zhvillimi i teknikës me këmbë. Përdorimi i goditjeve me kokë do të futet në mënyrë graduale dhe të kontrolluar vetëm atëherë kur futbollistët të arrijnë moshën e duhur të zhvillimit fizik.

Përveç kësaj, stafit teknik i është kërkuar të shmangë ushtrimet e tepërta të këtij lloji në ditët pranë ndeshjeve zyrtare. Anëtari i bordit të klubit, Raphael Varane, e mbështeti fuqishëm këtë nismë duke theksuar rëndësinë e mbrojtjes së trurit gjatë fazës së rritjes.

Ish-mbrojtësi nënvizoi se siguria e fëmijëve duhet të jetë gjithmonë prioriteti kryesor në metodologjinë e stërvitjes. Ky model inovativ pritet të shërbejë si shembull edhe për akademi të tjera në mbarë botën.