Importet e gazit të lëngshëm rus nga BE-ja rriten me 40% që nga pushtimi i Ukrainës

Importet e Bashkimit Evropian të gazit të lëngshëm natyror rus, janë rritur me 40 për qind që nga pushtimi i Ukrainës, pavarësisht përpjekjeve për të shkurtuar furnizimet.

Flukset e tubacioneve nga Rusia kanë rënë në nivelet më të ulëta historike, por dërgesat e gazit të lëngshëm natyror rus, nga e gjithë bota janë rritur.

Shtetet anëtare të BE-së kanë blerë më shumë se gjysmën e LNG-së të Rusisë në treg në shtatë muajt e parë të këtij viti, sipas analizës së të dhënave nga “Kpler”, e cila gjurmon trafikun detar dhe të cisternave.

Spanja dhe Belgjika, të cilat veprojnë si portat kryesore për furnizimet me LNG-në në bllok, janë shfaqur si konsumatorët e dytë dhe të tretë më të mëdhenj të LNG-së ruse, respektivisht pas Kinës.

“Vendet e BE-së tani blejnë shumicën e furnizimit të Rusisë, duke mbështetur një nga burimet më të rëndësishme të të ardhurave të Kremlinit”, tha Jonathan Noronha-Gant, një aktivist i lartë i karburanteve fosile në grupin kundër korrupsionit “Global Witness”, i cili bëri analizën, shkruan “The Guardian”, transmeton Klankosova.tv.

Rrjedha e gazit të gazsjellësit të Evropës nga Rusia ka rënë në nivelet më të ulëta historike që nga pushtimi i Ukrainës vitin e kaluar, por për të kompensuar mungesën, dërgesat e LNG-së së ftohur nga e gjithë bota, përfshirë Rusinë, janë rritur dhe nuk janë subjekt i ndonjë sanksioni të BE-së.

Vendet e BE-së blenë 22 milionë metra kub gaz të lëngshëm natyror rus, midis janarit dhe korrikut 2023, krahasuar me 15 milionë në të njëjtën periudhë të vitit 2021, tha “Global Witness”. /Klankosova.tv