‘Nxirreni që këtej’: Gjykatësi në Amerikë e dërgon vrasësin serial në burg të përjetshëm

Rex Heuermann, i njohur si vrasësi serial i Gilgo Beach, i cili pranoi vrasjen brutale të tetë grave, mori dënimin maksimal të mërkurën.

Ai do të vuajë tre dënime me burgim të përjetshëm për vrasje të shkallës së parë, plus 25 vjet deri në burgim të përjetshëm për katër akuza për vrasje të shkallës së dytë, të gjitha të njëpasnjëshme.

Dënimi në New York pasoi një sërë deklaratash tprekëse, ndërsa anëtarët e familjeve të viktimave përshkruan se si humbjet brutale krijuan “shkatërrim të përjetshëm” për ta.

Në prill, Heuermann konfirmoi se ai i mbyti dhe i lidhi viktimat e tij përpara se të shpërndante mbetjet e tyre përgjatë plazheve të largëta të Long Island, raporton BBC, transmeton Klankosova.tv.

“Je një njeri i vogël dhe i neveritshëm, nëse je burrë fare. Dhe je frikacak”, tha gjykatësi Timothy Mazzei ndërsa dha dënimin në një sallë gjyqi në Riverhead, Long Island. “Nxirreni që këtej.”

Salla e gjyqit shpërtheu në brohoritje.

Heuermann, i cili u shfaq me një kostum të errët, këmishë blu dhe kravatë gri, dha një deklaratë të shkurtër para dënimit, duke marrë përgjegjësinë, pastaj pranoi se në këtë pikë, fjalët e tij “nuk kishin kuptim”. Kur u pyet nga gjyqtari nëse i vinte “pak keq”, ai u përgjigj “po”.

Vrasjet ndodhën midis viteve 1993 dhe 2010, por çështja mori më shumë se një dekadë për t’u zgjidhur.