Burgu nuk i ndal: Shqiptarët në Angli komandojnë bandat përmes qindra telefonatave në ditë

Të burgosurit shqiptarë në Angli dhe Uells kanë realizuar më shumë se dyfishin e telefonatave nga burgu krahasuar me çdo shtetësi tjetër, sipas të dhënave të publikuara nga Ministria britanike e Drejtësisë (MoJ), raporton The Telegraph, transmeton Klankosova.tv.

Shifrat kanë nxitur debat dhe dyshime se disa grupe të krimit të organizuar mund të vazhdojnë të drejtojnë aktivitetet e tyre kriminale edhe nga qelitë.

Sipas statistikave, gjatë gjashtë muajve të fundit të burgosurit shqiptarë kanë kryer 157.962 telefonata, ose rreth 900 telefonata në ditë. Shqiptarët përbëjnë edhe grupin më të madh të të burgosurve të huaj në burgjet e Anglisë dhe Uellsit, me mbi 1.200 persona, të ndjekur nga polakët dhe rumunët.

Të dhënat tregojnë se shqiptarët, polakët dhe rumunët përfaqësojnë rreth një të katërtën e të gjithë të burgosurve të huaj në sistemin penitenciar britanik. Megjithatë, numri i telefonatave të kryera nga shqiptarët është rreth katër herë më i lartë se ai i polakëve dhe rumunëve.

Polakët, me 740 të burgosur, kanë realizuar 37.691 telefonata (rreth 209 në ditë), ndërsa rumunët, me 708 të burgosur, kanë bërë 37.307 telefonata (207 në ditë).

Pas shqiptarëve, numrin më të lartë të telefonatave e kanë të burgosurit irlandezë me 73.541 telefonata nga 678 persona, ndërsa amerikanët kanë regjistruar 57.867 telefonata nga vetëm 68 të burgosur.

Eksperti: Shifrat janë “jashtëzakonisht të larta”

Profesori Ian Acheson, ish-drejtor burgu dhe ish-këshilltar i qeverisë britanike për ekstremizmin në burgje, i cilësoi shifrat si “jashtëzakonisht disproporcionale”.

“Dihet se grupet kriminale shqiptare dominojnë shpërndarjen e drogës brenda burgjeve. Nuk është e qartë deri ku shtrihet ndikimi i tyre jashtë burgut, por nuk do të ishte befasuese nëse disa prej tyre do të përdornin telefonat për të koordinuar aktivitete kriminale. Është e arsyeshme të mendohet se mund të ketë një lidhje”, deklaroi ai për The Telegraph, transmeton Klankosova.tv.

Edhe sekretari britanik i Drejtësisë, David Lammy, ka paralajmëruar më herët se bosët e krimit të organizuar po vazhdojnë të drejtojnë rrjetet e tyre nga brenda burgjeve. Sipas tij, organizatat kriminale po përdorin gjithashtu dronë gjithnjë e më të sofistikuar për të futur drogë dhe armë në institucionet penitenciare, duke shmangur masat tradicionale të sigurisë.

Roli i grupeve shqiptare në trafikun e drogës

Sipas Agjencisë Kombëtare Britanike të Krimit (NCA), një pjesë e madhe e shtetasve shqiptarë të burgosur janë dënuar për vepra që lidhen me drogën ose vjedhjet. Autoritetet britanike vlerësojnë se grupet kriminale shqiptare kanë marrë një rol dominues në kultivimin e kanabisit në Britani, duke zëvendësuar grupet vietnameze si prodhuesit kryesorë vendas.

NCA thekson se shumë grupe shqiptare, të cilat më parë ishin të përfshira kryesisht në trafikun e kokainës, janë orientuar drejt kultivimit të kanabisit, pasi ky aktivitet konsiderohet me rrezik më të ulët dhe me fitime të larta. Sipas agjencisë, në Britani konsumohen rreth 240 tonë kanabis në vit, me një vlerë prej rreth 2.4 miliardë funtesh.

Autoritetet britanike kanë lidhur gjithashtu rritjen e numrit të emigrantëve shqiptarë që mbërritën me varka të vogla në vitin 2022 me përdorimin e tyre si fuqi punëtore në plantacionet e kanabisit të ngritura në banesa të përshtatura posaçërisht për kultivim.

Kërkesa për publikimin e statistikave sipas shtetësisë

Deputeti konservator Nick Timothy, i cili siguroi të dhënat për telefonatat nga burgjet, ka kërkuar publikimin e plotë të statistikave mbi kriminalitetin sipas shtetësisë së autorëve.

“Jo të gjitha shtetësitë paraqesin të njëjtin nivel rreziku për kriminalitetin. Nevojitet transparencë e plotë që publiku të dijë se kush po kryen krime në vend”, deklaroi ai, transmeton Klankosova.tv.

Sipas tij, të burgosurit shqiptarë kanë kryer më shumë telefonata ndërkombëtare sesa të burgosurit nga Shtetet e Bashkuara, Kanadaja, Japonia, Italia, Gjermania dhe Franca të marra së bashku.

Reagimi i Shërbimit të Burgjeve

Nga ana tjetër, Shërbimi Britanik i Burgjeve theksoi se nga këto të dhëna nuk mund të nxirren përfundime të drejtpërdrejta mbi aktivitet kriminal.

“Nuk mund të arrihen konkluzione vetëm mbi bazën e këtyre statistikave. Të dhënat nuk tregojnë identitetin apo rrethanat e personave që kanë kryer telefonatat. Të gjitha telefonatat regjistrohen, mund të monitorohen kur ekziston dyshim për veprimtari kriminale dhe paguhen nga vetë të burgosurit”, deklaroi një zëdhënës i institucionit.

Sipas statistikave, 10 shtetësitë me numrin më të lartë të telefonatave nga burgjet janë: Shqipëria (157.962), Irlanda (73.541), ShBA (57.867), Polonia (37.691), Rumania (37.307), Franca (33.844), India (32.581), Spanja (30.668), Italia (28.110) dhe Gjermania (27.278). /Klankosova.tv