Një muaj pas tërmeteve në Venezuelë, vendi përballet me krizë mjedisore dhe shëndetësore

Më shumë se një muaj pas tërmeteve shkatërruese që goditën Venezuelën, banorët e zonave më të prekura vazhdojnë të përballen me pasojat e rënda humanitare, ndërsa ekspertët paralajmërojnë për një krizë të mundshme mjedisore dhe shëndetësore.

Në qytetin bregdetar të La Guaira, makineritë e rënda vazhdojnë të pastrojnë rrënojat, ndërsa pluhuri nga ndërtesat e shembura mbulon lagjet e shkatërruara. Shumë familje jetojnë ende në kampe të improvizuara pranë shtëpive të dëmtuara, të cilat konsiderohen të pasigurta për t’u banuar.

Sipas të dhënave zyrtare, tërmetet me magnitudë 7.2 dhe 7.5 të 24 qershorit kanë shkaktuar mbi 5,000 viktima, rreth 17,000 të plagosur dhe afro 18,000 persona të pastrehë. Ndërkohë, numri i të zhdukurve mbetet i paqartë, ndërsa dëmet materiale vlerësohen në rreth 19.6 miliardë dollarë, raporton AP, transmeton Klankosova.tv

Organizatat humanitare dhe ekspertët e shëndetit publik paralajmërojnë se javët në vijim do të jenë vendimtare për të shmangur përhapjen e sëmundjeve dhe ndotjen e mjedisit. Rreth 1.2 milion ton mbetje nga ndërtesat e shembura përmbajnë materiale potencialisht të rrezikshme, si karburante, vajra, bojëra, tretës dhe azbest.

Autoritetet kanë nisur ndarjen e mbetjeve të riciklueshme nga ato të kontaminuara. Betoni dhe materialet e tjera të ripërdorshme pritet të përdoren për rindërtim, ndërsa mbetjet e rrezikshme do të transportohen në impiante të specializuara për asgjësim.

Ekspertët paralajmërojnë se menaxhimi i gabuar i rrënojave mund të ndotë ujërat bregdetare, të dëmtojë ekosistemet detare dhe të krijojë rreziqe serioze për shëndetin e banorëve. Ndërkohë, shumë qytetarë që marrin pjesë në kërkimet për të afërmit e tyre raportojnë probleme shëndetësore si kollë, alergji, ethe dhe dhimbje koke për shkak të ekspozimit të vazhdueshëm ndaj pluhurit dhe ndotësve.