Tmerrohen klientët e lokalit: 2-vjeçari sulmohet nga qeni, pëson lëndime të rënda

Një fëmijë dyvjeçar është sulmuar rëndë nga një qen në një incident tronditës, i cili ka ndodhur para klientëve të tmerruar në kopshtin veror të një lokali në Britani të Madhe.

Ngjarja ka ndodhur në lokalin “The Wulstan”, në zonën Wolstanton, ndërsa policia ka nisur hetimet për sulmin që ndodhi rreth orës 15:06 të së mërkurës, më 15 korrik.

Fëmija është dërguar për trajtim mjekësor, ku është konstatuar se kishte “lëndime të rënda” si pasojë e sulmit, transmeton Klankosova.tv.

Një klient i lokalit, 63-vjeçari Philip Preece, ka treguar se qeni dyshohet të ketë qenë i racës bulldog. Ai tha se skena ishte tronditëse dhe se nëna e fëmijës ishte në gjendje të rënduar emocionale.

“Fëmija ishte i mbuluar me gjak dhe dukej se kishte humbur shumë gjak. Nuk mund t’ia dalloja tiparet e fytyrës nga lëndimet”, ka deklaruar ai.

Preece tregoi se e kishte parë fëmijën vetëm pak çaste para sulmit, teksa po luante me lodra plastike në tavolinë bashkë me nënën e tij, pas një vakti ushqimi.

“Ishte një moment i zakonshëm familjar. Ai po luante me dinosaurë plastikë dhe sapo kishte ngrënë ushqim. Gjithçka dukej normale”, ka rrëfyer ai, shkruan Daily Star, transmeton Klankosova.tv.

Policia vazhdon hetimet për të zbardhur rrethanat e sulmit dhe për të përcaktuar se çfarë ndodhi para se qeni të sulmonte fëmijën.