“Marrëveshja me Iranin u kompletua”, Trump konfirmon lajmin e shumëpritur

Presidenti i Shteteve të Bashkuara të Amerikës, Donald Trump, ka njoftuar se është arritur një marrëveshje me Iranin, duke e cilësuar atë si një zhvillim të rëndësishëm pas muajsh negociatash mes palëve.

Lajmin e bëri të ditur vet ai përmes një postimi në platformën, “Truth Social”, ku tha se marrëveshja me Republikën Islamike të Iranit tashmë është përfunduar.

“Marrëveshja me Republikën Islamike të Iranit tani është kompletuar. Urime të gjithëve!”, shkroi Trump.

Megjithatë, presidenti amerikan nuk dha detaje konkrete rreth përmbajtjes së marrëveshjes, ndërsa autoritetet iraniane nuk kanë reaguar ende zyrtarisht lidhur me këtë njoftim.

Trump bëri të ditur gjithashtu se ka autorizuar heqjen e menjëhershme të bllokadës detare të SHBA-së ndaj Iranit, një vendim që sipas tij do të ndikojë drejtpërdrejt në qarkullimin e lirë të naftës dhe transportit detar në rajon.

Në të njëjtin postim, Trump tha se ka autorizuar hapjen pa tarifa të Ngushticës së Hormuzit, një nga rrugët detare më të rëndësishme për tregtinë globale të energjisë dhe naftës.