Zelensky: Putini po i rren të gjithë – nevojitet presion aktiv, jo veç bisedime

Presidenti ukrainas, Volodymyr Zelensky, ka thënë se paqja duhet të fillojë pa kushte dhe nëse Rusia nuk e do këtë, atëherë duhet t’i bëhet presion i fortë derisa ta bëjnë këtë.

Gjatë Samitit virtual për Ukrainën, Zelensky përsëriti qëndrimin e tij se heshtja e Rusisë për armëpushim 30-ditor tregon se Putini do ta vazhdojë ta zvarritë luftën.

“Një armëpushim tashmë mund të kishte ndodhur, por Rusia po bën gjithçka për ta parandaluar atë. Kjo është lufta e Rusisë – më shumë se tre vjet luftime dhe shkatërrime në shkallë të plotë. Për ta ndaluar këtë, nevojitet presion aktiv, jo vetëm bisedime”, tha Zelensky, transmeton Klankosova.tv.

Zelensky më tej tha se bota duhet ta kuptojë se Rusia është e vetmja pengesë e paqes, teksa shtoi se “Putini po i gënjen të gjithë” për situatën në Kursk dhe marrëveshjen e armëpushimit.