Yakin: As që e kemi menduar të shkojmë në Serbi pa Xhakën

Kombëtarja e Zvicrës e nisi me dy humbje në Ligën e Kombeve. Por tani, djemtë e Murat Yakin po duan të marrin pikët e para kundër Serbisë si mysafir dhe në shtëpi kundër Danimarkës.

Të enjten, 50-vjeçari prezantoi skuadrën për këto dy ndeshje.

Duke u ndalur te kapiteni Granit Xhaka dhe lidhja e tij emocionale me Kosovën, Yakin tha se as që është menduar ndonjëherë të shkohet në Serbi pa të.

“As që e kemi marrë në konsideratë të mos e marrim Granitin me vete në Serbi. Natyrisht se është një ndeshje emocionale, por s’kemi pse i hapim gjithmonë rrëfimet e vjetra”, tha Yakin në konferencën për media, raporton Klankosova.tv.

Në anën tjetër, Yakin njoftoi se Ruben Vargas nuk do të jetë pjesë e të ftuarve, për shkak të një lëndimi. Vendin e tij do ta zë Christian Witzig i FCSG, që është edhe prurje e re në ekip.

Në ndeshjen e parë të Zvicrës, Nico Elvedi ishte përjashtuar me të kuq. Federata zvicerane e ka konsideruar vendimin për përjashtimin e tij si kontrovers, dhe prandaj thonë se është ndëshkuar me vetëm një ndeshje moslojë. Ai do të jetë në dispozicion për dy ndeshjet e tetorit.

E para ndeshjes në St.Gallen kundër Danimarkës, do të ketë edhe nderime.

Tre yjet e Nati, siç e quajnë zviceranët kombëtaren e tyre, Xherdan Shaqiri, Yann Sommer and Fabian Schar, të cilët u pensionuan këtë verë, do të përshëndeten edhe zyrtarisht me fansat para ndeshjes.

Ndërkaq, Xhaka dhe “dostat” e tij po presin të udhëtojnë për në Serbi, gjegjësisht në qytetin e Leskovcit, më 12 tetor. Ndeshja kundër Danimarkës do të luhet më 15 tetor.