U godit nga vetura dje në Prizren, 59 vjeçari vdes në QKUK

Një burrë ka vdekur sot në Qendren Klinike dhe Universitare të Kosovës, ku ishte duke u trajtuar si pasojë e lëndimeve trupore të pësuara nga goditja e një veture.

Ngjarja e rëndë ndodhi dje në Prizren, ku i dyshuari ngasësi i veturës me targa sllovene, ishte duke lëvizur në rrugën “Ekrem Rexha”, në drejtimin  të lagjes Arbana.

Ai e godet  këmbësorin i cili ishte duke e kaluar rrugën nga ana e majtë në të djathtë, jashtë vendkalimit të shënuar të këmbësoreve.

Lidhur me rastin detaje ka dhënë zëdhënësi i policisë për rajonin e Prizrenit, Shaqir Bytyqi.

Bytyqi tha për Klankosova.tv se këmbësori u godit me pasqyrën e majtë të veturës që po lëvizte në shiritin e majtë të rrugës me dy shirita në një kahje.

“Si pasojë këmbësori pëson lëndime të rënda trupore, i cili dërgohet në Emergjencën e Spitalit të Prizrenit, nga ku pastaj është dërguar në QKUK në Prishtinë për trajtim të mëtutjeshëm, për shkak të lëndimeve të rënda trupore”, tha Bytyqi.

Ai shtoi se i dyshuari V.S, i lindur në vitin 1987 (shoferi i veturës) me urdhër të prokurorit kujdestar është dërguar në mbajtje.

Derisa, zëdhënësi i policisë njoftoi se sot nga QKUK-ja kanë pranuar informacion se viktima e rastit (S.K, 1987), ka vdekur.

“Me urdhër të prokurorit trupi I pa jetë dërgohet për ekzaminim në Institutin e Mjekësisë Ligjore”, tha Bytyqi për Klankosova.tv