Të dielën luhet derbi Drita-Ballkani, gjyqtar kryesor caktohet Lirim Jashari

Këtë javë luhet xhiroja e gjashtë e Superligës së Kosovës në futboll.

Në këtë xhiro do të luhet derbi mes Dritës dhe Ballkanit, ndeshje kjo që do të zhvillohet në Gjilan të dielën nga ora 15:00.

Tashmë FFK-ja i ka deleguar edhe gjyqtarët për këtë ndeshje, ku arbitri kryesor do të jetë Lirim Jashari, teksa anësorët do të jenë Buaj Selimaj e Fatlum Jashari, kurse gjyqtari i katërt do të jetë Vigan Ibërdemaj.

E, në VAR për këtë ndeshje do të jenë Genc Nuza dhe Arbnor Bullatovci, transmeton Klankosova.tv.

Kurse, ndeshjen mes Malishevës e Gjilanit do ta drejtojë Visar Kastrati, bashkë me ndihmësit Fatlum Berisha e Hekuran Osmani.

Ndeshja mes Suharekës e Feronikelit do të jetë nën gjykimin e Eridon Podvoricës, teksa referët anësorë do të jenë Fatmir Sekiraqa e Meriton Berisha.

Dueli mes Ferizaj e Llapit do të referohet nga gjyqtari Mervan Bejtullahu, kurse në krahët e tij do të jenë Edmond Zeqiri e Gzim Mehmeti.

Në kryeqytet do të luhet ndeshja mes Prishtinës dhe Dukagjinit, ku Dardan Çaka do ta ndajë drejtësinë në fushë, bashkë me Granit Hysenin e Bekim Ramën.