Shembja e urës në Baltimore: Mes viktimave dhe babai i tre fëmijëve

Gjashtë persona, duke përfshirë një baba të tre fëmijëve me origjinë nga El Salvadori, tani supozohen të vdekur pasi një anije me kontejnerë goditi urën ikonike në Baltimore, Francis Scott Key.

Roja Bregdetare e ShBA-së tha vonë të martën se kishte arritur në përfundim se burrat kishin vdekur dhe synonte të pezullonte përpjekjet masive të kërkim-shpëtimit.

Të gjithë besohet se janë anëtarë të një ekuipazhi që punonin në urë dhe janë shtetas të vendeve të Amerikës Latine.

Njëri nga punëtorët e zhdukur nga El Salvadori u identifikua si Miguel Luna nga organizata jofitimprurëse Casa, e cila ofron shërbime për komunitetin e emigrantëve në Baltimore.

“Ai është bashkëshort, baba i tre fëmijëve dhe e ka quajtur Marylandin shtëpinë e tij për më shumë se 19 vjet”, tha drejtori ekzekutiv i Casas, Gustavo Torres në një deklaratë.

Marvin Luna, djali i Miguel Lunas, i tha Washington Postit se ai e dinte se babai i tij ishte në urë gjatë natës, por nuk e dinte se ajo ishte shembur derisa miqtë e thirrën dhe i thanë: “Ura është zhdukur”.