“Serbëve po u pengon flamuri kuqezi” / Kush e shkuli flamurin te varrezat e dëshmorëve? (VIDEO)

Flamuri kuqezi, i cili qëndron në varrezat e dëshmorëve të Pejës, dikujt po ia zë rrugën.

Në varrezat e Lagjes Dardania 3 të qytetit të Pejës, vend ky në të cilin prehen trupat e 7 dëshmorëve dhe qindra banorëve të tjerë pejanë, shkeli këmba edhe e dikujt që nuk hyri për homazhe e as për rikujtim të të vdekurve – por për të dëmtuar.

Para dy javësh, për herë të tretë brenda tri vjetësh, flamurin e shqeu dhe ia zhduku gjurmët totalisht dikush i panjohur, raporton Kiks Kosova.

Brahim Komoni, i cili është familjar i disa të rënëve në luftë që prehen në varrezat në fjalë, thotë që për herën e fundit kur u dëmtua sërish flamuri kombëtar, u njoftua nga një komshi i tij.

E kjo madje nuk ishte më risi për të, ngase dëmtimet u bënë të shpeshta.

Jo vetëm flamurin, por herën e parë kur ndodhi rasti, kryerësi i veprës e kishte larguar komplet shtyllën metalike ku ishte i vendosur flamuri andaj Komoni u detyrua ta zëvendësojë me komplet një shtyllë të re.

Pas kësaj, as policinë Komoni nuk la pa e informuar, ndonëse thotë që identifikimi i fajtorit ende nuk është bërë.

Por kujt po i pengon flamuri kuqezi?

Sipas Komonit, afër Lagjes Dardania 3, është fshati Gorozhdec, kryesisht i banuar nga serbët, dhe ka mundësi që dikush nga banorët atje mund të jetë fajtori.

Kjo ngase sipas tij, është e pabesueshme që shqiptarët mund ta kenë prekur.

Detajet tjera i gjeni në kronikën në vijim:

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.