Rreth 27 mijë maturantë në Shqipëri i nënshtrohen testit të fundit të Maturës

26 mijë e 600 maturantë në të gjithë Shqipërinë zhvillojnë këtë të martë testin e fundit të Maturës Shtetërore 2026.

Provimi nis në orën 10:00 dhe zgjat 2 orë e 30 minuta. Për zhvillimin e tij janë ngritur 144 qendra testimi në shkolla në mbarë vendin, shkruan Tvklan.al, transmeton Klankosova.tv.

Bëhet e ditur se procesi do të mbështetet nga 2 mijë e 87 mësues administratorë dhe 170 monitorues të Ministrisë së Arsimit, ndërsa 650 vlerësues do të angazhohen në korrigjimin e testeve.

Autoritetet arsimore u kanë bërë thirrje maturantëve të respektojnë me rigorozitet rregullat e përcaktuara për mbarëvajtjen e provimit. Nxënësit duhet të paraqiten në ambientet e shkollës jo më vonë se ora 08:30, të kenë me vete kartën e identitetit dhe të jenë të veshur sipas rregullores, përfshirë uniformën e shkollës aty ku ajo aplikohet.

Po ashtu, ndalohet përdorimi i telefonave celularë dhe orëve inteligjente gjatë testimit. Maturantëve u kërkohet të tregojnë korrektësi dhe përqendrim maksimal gjatë zhvillimit të provimit.