Policia identifikon britaniken përmes tatuazhit të veçantë tre dekada pas vrasjes

Një grua britanike është identifikuar më shumë se 30 vjet pas vrasjes së saj në Belgjikë, pas nisjes së një fushate historike të policisë.

Familja e Rita Roberts e pa tatuazhin e saj të veçantë me lule në një raport të BBC, sipas agjencisë së policisë Interpol.

Kontakti i fundit që 31-vjeçarja pati me familjen e saj ishte nëpërmjet një kartoline në maj të vitit 1992. Trupi i saj u gjet një muaj më pas.

Familja e saj tha se lajmi ishte “tronditës dhe zemërthyes”.

“Motra jonë e pasionuar, e dashur dhe me shpirt të lirë u mor mizorisht”, thanë ata në një deklaratë, të ndarë nga Interpoli. “Ndërsa lajmi ka qenë i vështirë për t’u përpunuar, ne jemi jashtëzakonisht mirënjohës që kemi zbuluar se çfarë i ndodhi Ritës”, raporton BBC, transmeton Klankosova.tv.

Roberts ishte një nga 22 gratë e vrara që policia në Evropë kërkonte t’i identifikonte përmes një fushate të nisur në fillim të këtij viti, të quajtur Operacioni “Identify Me”.

Fushata shënoi herën e parë që Interpoli doli publikisht me një listë të të ashtuquajturave njoftime të zeza, duke kërkuar informacion për trupa të paidentifikuar. Njoftime të tilla zakonisht qarkullojnë vetëm brenda rrjetit të forcave policore të Interpolit në të gjithë botën.

Shumica e viktimave ishin të moshës nga 15 deri në 30 vjeç, transmeton Klankosova.tv.