Plagosen civilë nga raketat e lëshuara nga Libani, thotë ushtria izraelite

Ushtria izraelite ka thënë se disa civilë në Izraelin verior janë plagosur pasi raketat anti-tank u lëshuan nga përtej kufirit me Libanin të dielën.

“Pak kohë më parë, terroristët lëshuan raketa antitanke në drejtim të zonës së Dovev në Izraelin verior. Një numër civilësh u plagosën si rezultat i lëshimeve. Artileria e IDF-së po godet origjinën e lëshimit”, Forca e Mbrojtjes së Izraelit tha në një deklaratë.

IDF-ja tha se goditi atë që e përshkroi si një “objektiv terrorist të ngulitur në një zonë civile në Liban”, për të cilën IDF-ja tha se “kishte synuar të hapte zjarr në drejtim të territorit izraelit”.

Grupi militant libanez, Hezbollah ka marrë përgjegjësinë për sulmin, duke thënë se ai kishte në shënjestër një ekip logjistik ushtarak që ishte gati të fillonte ngritjen e kullave të komunikimit dhe pajisjeve të vëzhgimit, raporton CNN, transmeton Klankosova.tv.

Hezbollahu – i cili ka gjuajtur raketa antitank përtej kufirit në disa raste gjatë muajit të kaluar – pretendoi në deklaratën e tij se sulmi kishte vrarë dhe plagosur një numër të paspecifikuar individësh.

Sekretari i Përgjithshëm i grupit militant, Hassan Nasrallah, tha në një fjalim të rrallë të shtunën se grupi i tij do të vazhdojë presionin ndaj Izraelit, ndërsa vendi kërkon të “imponojë nënshtrim” në rajon.