Pas ankesës në “Fol me Arin” largohet bërlloku në rrugën “Raif Pollomi” në Prishtinë

Gjatë transmetimit të sotëm të emisionit “Fol me Arin” në Klan Kosova është pranuar një ankesë nga banorët lidhur me gjendjen e rënduar të mbeturinave në rrugën “Raif Pollomi”, në lagjen “Mati 1” të Prishtinës.

Sipas qytetarëve, në këtë lokacion ishte grumbulluar një sasi e madhe mbeturinash, të cilat kishin mbetur të papastruara tash e një kohë, duke shkaktuar shqetësim për banorët e zonës.

Pas pranimit të ankesës, ekipi i emisionit “Fol me Arin” kontaktoi Drejtorinë e Shërbimeve Publike dhe kompaninë “Pastrimi”, duke i njoftuar për gjendjen gjatë kohës së transmetimit.

Vetëm disa orë më vonë, u konfirmua se mbeturinat ishin larguar plotësisht nga vendi, duke zgjidhur kështu problemin e raportuar nga qytetarët. /Klankosova.tv