Njofton MPB: Sistemi i Hyrje/Daljes (EES) zbatohet plotësisht në Zonën Schengen nga sot

Ministria e Punëve të Brendshme e Republikës së Kosovës ka njoftuar se Sistemi i Hyrje/Daljes (Entry/Exit System – EES) i Bashkimit Evropian do të zbatohet plotësisht në të gjitha pikat e kalimit kufitar të Zonës Schengen nga 10 prilli 2026.

Ky sistem është një avancim i rëndësishëm për sigurimin e kufijve dhe kontrollin e hyrjes dhe daljes së qytetarëve nga shtetet jo-anëtare të BE-së, përfshirë këtu edhe qytetarët e Kosovës.

“Sistemi EES është një sistem i automatizuar dhe biometrik që regjistron hyrjet dhe daljet e shtetasve të vendeve jo-anëtare të BE-së, përmes mbledhjes së të dhënave si: gjurmët e gishtërinjve; fotografia e fytyrës; të dhënat e dokumentit të udhëtimit.

“Nga 10 prilli 2026, ky sistem zëvendëson plotësisht vulosjen manuale të pasaportave dhe mundëson identifikimin automatik të qëndrimeve të tejkaluara”, bëjnë të ditur nga MPB. /Klankosova.tv