Nga “O sa mirë në teatër”, Edi Kastrati rolin kryesor në shfaqjen e regjisorit Valon Pallaska

Ai është drejtor i Teatrit Profesional të Qytetit të Gjakovës, ndërsa emri i tij u bë shumë i dashur për publikun shqiptar me rolin që mori në serinë komike “O sa mirë”.

Ndërsa për publikun e qytetit ku u lind e u rrit, këtë të premte do të interpretojë një rol në shfaqjen e dytë të regjisorit të ri gjakovar, Valon Pallaska.

Në Teatrin e Gjakovës, këtë të premte jepet premiera e shfaqjes “Gjashtë” me autor Arian Krasniqi, ndërsa me regji të Pallaskës. Rolin kryesor atë të një prifti në këtë shfaqje, e luan Edi Kastrati krah aktores së njohur Elida Shasivari.

Përderisa për skenografinë është kujdesur Petrit Bakalli, në dërrasat e teatrit të Gjakovës, Pallaska sjell një shfaqje teatrale që në fokus ka dramën.

Kjo shfaqje flet për Anën, e cila është e dënuar me burgim të përjetshëm dhe pret ekzekutimin në orën 6 të mëngjesit.

Para se ajo t’i nënshtrohet dënimit me vdekje, në ora 12 të darkës vjen Prifti për rrëfim dhe falje të mëkateve të Anës, e cila pasi nuk pranon që t’i falë mëkatet fillon të tregojë rrëfimin e jetës së saj, duke filluar nga babai i cili e ka martuar pa dëshirën e saj, shkruan Prive.al, transmeton Klan Kosova.

Nga ajo martesë Ana lind një fëmijë të cilin e ka braktisur, e më pas burrin e ekzekuton me gjashtë plumba.