Morgjet në Francë drejt mbingarkesës pas valës rekord të të nxehtit

Vala rekord e të nxehtit që përfshiu Francën ka lënë pas pasoja të rënda, ndërsa morgjet dhe shërbimet funerale po përballen me një numër të pazakontë viktimash.

Që nga fillimi i temperaturave ekstreme, drejtorët e funeraleve në Paris dhe qytete të tjera kanë pasur vështirësi të përballojnë fluksin e trupave. Telefonatat për pranimin e viktimave vijnë çdo pak minuta. Me të 32 vendet e dhomës frigoriferike të mbushura, drejtori i një shtëpie funerale, Zouhaeir Hertelli, detyrohet t’u përgjigjet vazhdimisht familjarëve me fjalën: “Jo.”

“Po përballemi me një situatë vërtet katastrofike. Po marr qindra telefonata,” tha ai.

Ndërsa vala historike e të nxehtit është zhvendosur drejt pjesëve të tjera të Evropës, autoritetet franceze kanë nisur të vlerësojnë koston njerëzore që ajo ka lënë pas. Procesi i konfirmimit të vdekjeve të lidhura me temperaturat ekstreme pritet të zgjasë javë, madje edhe muaj, shkruan Mirror, transmeton Kalnkosova.tv.

Megjithatë, sipas autoriteteve shëndetësore, është tashmë e qartë se numri i viktimave është i lartë, veçanërisht mes të moshuarve që humbën jetën në banesat e tyre.

“Po përballemi me një rritje të jashtëzakonshme të numrit të vdekjeve për shkak të valës së të nxehtit dhe kapacitetet tona janë të mbushura plot,” u shpreh Hertelli.

Sipas Shëndetit Publik të Francës, të mërkurën, ditën kur vendi regjistroi temperaturën më të lartë në historinë e tij, u raportuan rreth 1.200 vdekje, duke thyer rekordin e vendosur vetëm një ditë më parë.

Numri i vdekjeve u rrit në mbi 1.400 të enjten dhe mbeti në të njëjtin nivel edhe të premten. Për krahasim, para valës së të nxehtit, gjatë muajve prill dhe maj, mesatarja ditore e vdekjeve në Francë ishte rreth 900 deri në 1.000.

Agjencia shëndetësore franceze vlerëson se vetëm gjatë këtyre tre ditëve të nxehta janë regjistruar të paktën 1.000 vdekje shtesë. Megjithatë, ky bilanc pritet të rritet, pasi ende po përpunohen certifikatat e vdekjes për personat që ndërruan jetë në shtëpi ose në qendrat e kujdesit për të moshuarit, ku shumica e rasteve nuk regjistrohen ende në mënyrë elektronike.