Messi pas penalltisë së humbur: U zemërova shumë, e godita shumë keq

Lionel Messi ka pranuar se ishte “shumë i zemëruar” me veten pas humbjes së një penalltie në fillim të ndeshjes ndaj Austrisë, megjithatë reagoi në mënyrën më të mirë të mundshme duke realizuar dy gola dhe duke vendosur një rekord historik në Kupën e Botës.

Kapiteni i Argjentinës gaboi nga pika e bardhë në minutën e nëntë, një moment i rrallë për të, duke shënuar vetëm herën e tretë që dështon nga penalltia në një Botëror, transmeton Klankosova.tv.

Por zhgënjimi nuk zgjati shumë, pasi 38-vjeçari gjeti rrugën e rrjetës para pushimit dhe më pas vulosi fitoren 2-0 në minutat shtesë.

Me këto dy gola, Messi arriti në 18 realizime në Kupat e Botës, duke kaluar Miroslav Klosen dhe duke u bërë golashënuesi më i mirë në historinë e turneut.

“E godita shumë keq. Sot pati një moment kur isha shumë i zemëruar për penalltinë e humbur, por për fat të mirë arritëm ta përmbysim situatën dhe të marrim tri pikët,” u shpreh Messi pas ndeshjes.

Ai theksoi se ndeshja nuk ishte aspak e lehtë, duke shtuar se Austria luajti në mënyrë intensive dhe të organizuar, por sipas tij më e rëndësishmja ishte fitorja dhe sigurimi i kualifikimit, transmeton klankosova.tv.

“Ne gjithmonë hyjmë në fushë për të fituar. Jemi Argjentina dhe duam të fitojmë çdo ndeshje. Jam shumë i lumtur për fitoren dhe për faktin që arritëm objektivin,” deklaroi kapiteni argjentinas.

Argjentina tashmë ka siguruar kualifikimin në fazën e eliminimit direkt dhe do ta mbyllë fazën e grupeve ndaj Jordanisë, duke i dhënë mundësi trajnerit Lionel Scaloni të pushojë disa prej titullarëve.