Mesazhi prekës i aktores shqiptare që mposhti kancerin

Ajo luftoi shumë, rezistoi përballë sëmundjes vdekjeprurëse dhe në fund ia doli të qëndrojë e fortë duke u kapur pas jetës.

Aktorja e mirënjohur e kinematografisë shqiptare dhe teatrit, Hajrie Rondo, u ngjit sërish në skenë aty ku edhe numëron me dhjetëra role të suksesshme.

E ndërsa vetë ia doli të fitojë mbi të keqen, Rondo vjen edhe me një mesazh të fortë për të gjithë gratë dhe vajzat në muajin kundër kancerit të gjirit:

“Bëhuni të forta, jeta është e bukur dhe jeta duhet mbajtur fort, me dhëmbë”.

Më poshtë fjala e plotë e aktores në ceremoninë e marrjes së Medaljes së Mirënjohjes nga kryetari i Bashkisë së Tiranës.

“Ne mbrëmë kishim premierën në Teatrin e Metropolit dhe unë jam pjesë e asaj shfaqeje. Kur dy zonjushat e nderuara, drejtoresha dhe Sonila më bënë ofertën isha në dilemë, do ta marr apo jo thashë? 

Do të rri në shtëpi të mbyllem dhe të bashkëbisedoj e trishtuar me sëmundjen apo ti them asaj def, ik tutje sepse kam pak punë? Zgjodha këtë të dytën dhe bëra mirë dhe ia dola. U lodha një çikë vërtet por gjithë stafi, drejtoresha, regjisorja dhe partnerët ma amortizuan dhe ma lehtësuan sëmundjen.

Me këtë rol le të kontribuoj pak edhe mesazhi, meqë është dhe muaji i luftës kundër kancerit të gjirit, për t’iu dhënë të gjitha grave shqiptare dhe për t’iu thënë atyre që të bëhen të forta, jeta është e bukur dhe jeta duhet mbajtur fort, me dhëmbë.

Kam një bekim nga nëna ime dhe kam edhe një poezi që unë e mbaj në arkivin tim si artiste dhe sa herë më duhen e recitoj. Është një poezi me pak vargje, nëse dëshironi:

Më lindi nëna rreth vatrës zjarr ndriçuar

Përreth, ishte errësirë

Në terr e qara ime u dëgjua

Në këmbë u ngrit një ditë mugëtirë

Por diellin në sy ma la të shkruar

Me dritën do të vdes e dashuruar

Faleminderit të gjithë pjesëmarrësve, duke filluar që nga i lashti i skenës, Nderi i Kombit, zoti Arbana dhe deri te më të rinjtë, te Gazi, te vajza ime, të gjithë stafin, te motra ime e dashur, mbesa dhe të gjithë stafin tuaj zoti kryetar.

 Betohem dhe të jap fjalën që do të luftoj, do të luftoj fort t’i ngjit prapë ato shkallë, ajo është shtëpia ime”./lapsi.al