Më shumë se 800 persona kanë vdekur në Gjermani për shkak të valëve të të nxehtit

Këtë vit, mbi 800 njerëz vdiqën në Gjermani si pasojë e valëve të të nxehtit, njoftoi Instituti shtetëror Robert Koch, duke iu referuar periudhës para valës ekstreme të të nxehtit në fund të qershorit.

“Deri më 21 qershor, mbi 800 njerëz kishin vdekur si pasojë e të nxehtit, ku numri më i madh, 500 prej tyre, ishin njerëz mbi moshën 85 vjeç”, tha në një deklaratë Instituti shtetëror Robert Koch, raporton Index.hr, transmeton Klankosova.tv 

Në grupmoshën midis 75 dhe 84 vjeç, u regjistruan 190 vdekje të shkaktuara nga i nxehti, ndërsa midis atyre më të rinj se 65 vjeç, rreth 40 vdiqën.

Në të njëjtën kohë, u njoftua se analiza u krye në javët para mbërritjes së nxehtësisë ekstreme në Gjermani në fund të qershorit, kur rekordi i mëparshëm u thye me 41.7 gradë.

Statistikat mbi vdekjet që lidhen me nxehtësinë mund të ndryshojnë sapo të dalin rezultatet për periudhën më të nxehtë. “Vdekjet u shkaktuan ose nga goditja direkte nga nxehtësia ose nga një kombinim i temperaturave të larta dhe sëmundjeve ekzistuese”, tha Instituti Robert Koch në një deklaratë.

Në vitet e fundit, numri më i lartë i vdekjeve të shkaktuara nga temperaturat e larta u regjistrua në vitin 2018, kur 8,000 njerëz vdiqën nga efektet e nxehtësisë.

Kur bëhet fjalë për statistikat e këtij viti, shumica e vdekjeve janë gra, gjë që shpjegohet me faktin se ka më shumë gra sesa burra në grupin e qytetarëve mbi 85 vjeç.  /Klankosova.tv