Lufta e fundit e nënës nga Shkodra për fëmijët – u përpoq t’i mbronte nga zjarri, s’ia doli

Një bombol gazi dyshohet të jetë bërë shkak për  zjarrin që shkaktoi  tragjedinë  në  Postribë të Shkodrës mesditën e të mërkurës.

Në shtëpinë ku humbën jetën nëna 24-vjeçare me dy fëmijët e mitur në fshatin Domen, zjarrfikësit  gjetën mbetje të një bombole të vogël gazi.

Aktualisht grupi hetimor dyshon se nëna mund të ketë tentuar të ndezë bombulën e gazit për të gatuar.

Bëhet e ditur se bombola  mund të ketë pasur rrjedhe gazi dhe mund të ketë shpërthyer në flakë.

Bombola dhe susta e shtratit ishin  të vetmet sende që i kishin rezistuar flakëve, sipas policisë e cila aktualisht thotë se ngjarja ishte aksidentale.

Trupat e viktimave, thanë burime  nga grupi i hetimit  u gjetën pranë njërit tjetrit.

Hetuesit mendojnë se në momentin kur ka rënë zjarri  nëna ka tentuar  të mbrojë fëmijët nga flakët  pa mundur të dalë jashtë.

Djali  1 vjeç iu gjet në duar, ndërsa fëmija 3 vjeç pranë.

Jashtë banese  ndodheshin çantat me të cilat familja Çelaj kishte shkuar në shtëpinë e vjetër.

Provat e gjetura do t’i nënshtrohen ekspertizës, me qëllim sigurimin e të dhënave që mund t’i shërbejnë hetimit.

Bashkëshorti i 24-vjeçares i ka thënë policisë se me vete ata kishin marrë dhe një shishe benzinë për kryer disa pastrime.

Në momentin kur banesa është përfshirë nga flakët ai ka thënë se ka qenë në një market duke blerë produkte për familjen.

Pranë shtëpisë nuk ka  banesa të tjera, duket se kjo  ka bërë që zjarri të konstatohet me vonesë.

Mungesa e një njoftimi në kohën e duhur dhe terreni i thyer malor kanë rezultuar fatal për nënën dhe dy të vegjlit e familjes Çela.

Ata jetonin në Gjermani dhe pak ditë më parë kishin ardhur për pushime./abcnews.al