Kryeministri polak thotë se nuk ka “Plan B” për ndihmën e BE-së për Ukrainën

Kryeministri polak Donald Tusk tha të enjten se nuk kishte “Plan B” për ndihmën e Bashkimit Evropian për Ukrainën dhe kryeministri hungarez Viktor Orban, i cili po e pengon atë, duhet të vendosë nëse Hungaria është “pjesë e komunitetit tonë”.

“Ne duhet të luajmë fort dhe të luajmë drejt, por nuk ka vend për kompromis. Nuk ka rrugë të mesme – ose ju jeni në anën ukrainase ose në anën ruse”, tha Tusk përpara një samiti të liderëve të 27 vendeve anëtare të BE-së.

Orban është i vetmi nga 27 që ka shprehur mosmiratimin e një pakete ndihme të BE-së dhe ka kërkuar një votim vjetor për ndihmën afatgjate, raporton Reuters, transmeton Klankosova.tv.

Samiti i të enjtes shihet si një mundësi e fundit për të arritur një marrëveshje mbi një plan katërvjeçar për 50 miliardë euro (53.93 miliardë dollarë) ndihmë ekonomike për Ukrainën, e cila po lufton një pushtim rus që nga viti 2022.

Hungaria, e cila kultivon lidhje të ngushta me Moskën, ka bërë presion për një rishikim vjetor që do t’i jepte të drejtën për të vënë veton ndaj disbursimeve çdo vit.