Ish-zyrtarët e IDF-së thonë se Netanyahu duhet të shkarkohet: Gjaku i viktimave është në duart e tij

Më shumë se 40 ish-zyrtarë të lartë izraelitë të sigurisë kombëtare, shkencëtarë të famshëm dhe udhëheqës të shquar biznesi i kanë dërguar një letër presidentit dhe kryetarit të parlamentit të Izraelit duke kërkuar që kryeministri izraelit, Benjamin Netanyahu të shkarkohet nga detyra për paraqitjen e një kërcënimi “ekzistential” ndaj vendit.

Nënshkruesit e letrës përfshijnë katër ish-drejtorë të shërbimeve të sigurisë së jashtme dhe të brendshme të Izraelit, dy ish-krerë të Forcave të Mbrojtjes të Izraelit (IDF) dhe tre fitues të çmimit Nobel, shkruan CNN, transmeton Klankosova.tv.

Letra godet koalicionin e mbledhur nga Netanyahu për të formuar qeverinë më të djathtë ndonjëherë në Izrael, së bashku me përpjekjet e tij shumë të diskutueshme për të riparuar gjyqësorin e Izraelit që ata thonë se çuan në gabime sigurie që rezultuan në sulmet e 7 tetorit, dita më vdekjeprurëse në historinë e Izraelit.

“Ne besojmë se Netanyahu mban përgjegjësinë kryesore për krijimin e rrethanave që çuan në masakrën brutale të mbi 1 mijë e 200 izraelitëve dhe të tjerëve, plagosjen e mbi 4 mijë e 500 dhe rrëmbimin e më shumë se 230 individëve, nga të cilët mbi 130 ende mbahen në robëri të Hamasit. ”, thuhet në letër. “Gjaku i viktimave është në duart e Netanyahut”.