AP: Lajçaku u kërkoi Kosovës dhe Serbisë marrëveshje para zgjedhjeve në BE e ShBA

I dërguari i Bashkimit Evropian për Ballkanin Perëndimor të martën i kërkoi Kosovës dhe Serbisë që të shpejtojnë përpjekjet për normalizimin e marrëdhënieve të tyre përpara se të zhvillohen dy palë zgjedhje të rëndësishme ndërkombëtare.

Miroslav Lajçak u takua me presidenten e Kosovës Vjosa Osmani, kryeministrin Albin Kurti dhe zyrtarë të tjerë në Prishtinë, pas vizitës së një dite më parë në Beograd.

“Ne as nuk duhet të pyesim veten se si ta bëjmë këtë. Pyetja është kur duhet bërë? Dhe sigurisht, nëse më pyesni mua, do të thosha pa vonesë sa më shpejt të jetë e mundur”, u tha Lajçak gazetarëve, raporton AP, transmeton Klankosova.tv.

BE-ja dhe Shtetet e Bashkuara po u bëjnë presion të dyja vendeve për të zbatuar një plan të sponsorizuar nga BE-ja që presidenti serb Aleksandar Vuçiq dhe kryeministri Kurti arritën marsin e kaluar.

Parlamenti Evropian do të mbajë zgjedhjet në qershor dhe Shtetet e Bashkuara më vonë këtë vit, tha ai, duke shtuar, “Kjo do të thotë se vëmendja, natyrisht, në fund të këtij viti do të përqendrohet në këto procese”.

Lajçak përmendi marrëveshjen për pagesën e energjisë së konsumuar në veri të Kosovës dhe njohjen reciproke të targave të makinave, si shenja pozitive. /Klankosova.tv

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.