ShBA paralajmëron qytetarët e vet në Lindje të Mesme: Keni kujdes, situata e sigurisë “komplekse”

Ambasada e Shteteve të Bashkuara në Aman ka lëshuar një paralajmërim sigurie, duke u bërë thirrje shtetasve amerikanë në Jordani dhe në mbarë Lindjen e Mesme të tregojnë kujdes të shtuar për shkak të rritjes së tensioneve në rajon dhe rrezikut të përshkallëzimit të mëtejshëm të situatës.

Sipas ambasadës, situata e sigurisë mbetet “komplekse”, ndërsa ekziston mundësia e anulimit të fluturimeve, mbylljes së përkohshme të hapësirës ajrore dhe ndërprerjeve më të gjera në udhëtime, raporton Klankosova.tv.

Amerikanët që ndodhen aktualisht në rajon janë këshilluar të jenë vigjilentë dhe të përgatiten për ndryshime të mundshme në planet e tyre të udhëtimit.

Ambasada bëri të ditur se disa kompani ajrore kanë shtyrë rikthimin në oraret e mëparshme të fluturimeve, ndërsa të tjera kanë anuluar disa linja. Udhëtarëve u është rekomanduar të verifikojnë statusin e fluturimeve drejtpërdrejt me kompanitë ajrore dhe të ndjekin përditësimet nga aeroportet.

Security Alert: U.S. Embassy Amman – August 1, 2026

Event: Due to heightened tensions in the Middle East, the security environment remains complex with the potential for unforeseen escalation.

Americans currently in the Middle East should exercise caution and heightened… pic.twitter.com/LheYwCCbVY

— U.S. Embassy Amman (@USEmbassyJordan) August 1, 2026

Ndërkohë, shtetasit amerikanë që ndodhen jashtë Lindjes së Mesme janë këshilluar të rishqyrtojnë udhëtimet drejt rajonit ose tranzitin përmes tij.

Paralajmërim për kërcënime të mundshme

Ambasada theksoi se objektet diplomatike dhe interesat amerikane kanë qenë objektiv i sulmeve edhe në të kaluarën, duke shtuar se Irani dhe grupet që e mbështesin atë mund të shënjestrojnë objekte, biznese dhe institucione të lidhura me ShBA-në jashtë vendit.

Situata është përshkruar si “dinamike”, ndërsa qytetarëve u është bërë thirrje të qëndrojnë vigjilentë, duke theksuar se fakti që një vend ka qenë i sigurt më parë nuk garanton se do të mbetet i tillë edhe në të ardhmen.

Këshillat për shtetasit amerikanë në Jordani

Ambasada u rekomandon qytetarëve amerikanë që:

• Të ndjekin përditësimet e autoriteteve jordaneze dhe të zbatojnë udhëzimet emergjente, përfshirë sirenat dhe paralajmërimet.
• Të shmangin protestat, tubimet e mëdha dhe zonat me prani të shtuar të policisë.
• Të shmangin udhëtimet pranë bazave ushtarake në Jordani.
• Të ndjekin mediat lokale dhe njoftimet zyrtare.
• Të kontaktojnë drejtpërdrejt kompanitë ajrore për çdo ndryshim të fluturimeve.
• Të tregojnë kujdes pranë objekteve që lidhen me Shtetet e Bashkuara.
• Të mbajnë profil të ulët dhe të jenë të kujdesshëm.

Gjithashtu, Ambasada inkurajoi shtetasit amerikanë të regjistrohen në programin “Smart Traveler Enrollment Program (STEP)” të Departamentit amerikan të Shtetit, në mënyrë që të marrin përditësime mbi sigurinë dhe të kenë qasje në ndihmë emergjente. /Klankosova.tv