Rusia dhe Ukraina shkëmbejnë sulme gjatë natës – 3 të vrarë dhe 6 të plagosur

Rusia dhe Ukraina akuzuan njëra-tjetrën për kryerjen e sulmeve gjatë natës së të shtunës, të cilat lanë të vdekur tre persona dhe të plagosur gjashtë të tjerë në të dyja palët.

Në Ukrainë, dy persona humbën jetën nga një sulm rus në rajonin e Sumyt, i cili dëmtoi infrastrukturën civile, magazina dhe automjete, njoftoi në Telegram guvernatori rajonal, Oleh Hryhorov, shkruan Anadolu, transmeton klankosova.tv.

Një person u vra pasi Moska bombardoi distriktin qendror të Khersonit në orët e para të mëngjesit, sipas guvernatorit Oleksandr Prokudin.
Forcat Ajrore të Ukrainës njoftuan se Rusia lëshoi ​​dy raketa të drejtuara dhe 157 dronë gjatë natës, dhe se 128 objektiva ajrore u kapën ose u neutralizuan mbi veriun, jugun, lindjen dhe qendrën e vendit.

Në rajonin rus të Rostovit, pesë persona mbetën të plagosur në atë që guvernatori Yury Slyusar e përshkroi si një sulm ajror “masiv” ukrainas.