Pse burrat zgjohen me ereksion?

Edhe pse për shumë burra zgjimi me ereksion mund të duket i sikletshëm, ekspertët thonë se ai është një tregues i rëndësishëm i shëndetit hormonal dhe kardiovaskular.

Sipas mjekut Jeff Foster, drejtor mjekësor për shëndetin e burrave në Voy, shpeshtësia e ereksioneve të mëngjesit lidhet ngushtë me nivelin e testosteronit dhe gjendjen e përgjithshme shëndetësore.

Tema u diskutua në podcastin “Man Alive”, ku ish-lojtari i regbit Joe Marler pranoi se me kalimin e viteve nuk zgjohet më me ereksion aq shpesh sa dikur, shkruan Metro, transmeton Klankosova.tv.

“Herë pas here më ndodh, por jo aq shpesh sa më parë”, tha ai.

Dr. Foster shpjegoi se kjo është pjesërisht normale, pasi niveli i testosteronit bie gradualisht me moshën, por një rënie e madhe e shpeshtësisë mund të sinjalizojë probleme të tjera shëndetësore.

Sa shpesh duhet të ndodhë?

Sipas Dr. Foster, frekuenca e pritshme ndryshon sipas moshës:

Adoleshentët dhe burrat në të 20-at – pothuajse çdo ditë ose çdo mëngjes.

Në të 30-at – në më shumë se gjysmën e ditëve.

Në të 40-at dhe 50-at – rreth dy deri në tre herë në javë.

Në të 60-at – një ose dy herë në javë.

Mjeku thekson se nëse një burrë nuk mban mend herën e fundit kur është zgjuar me ereksion, duhet të konsultohet me mjekun.

“Ky mund të jetë një tregues i mirë se hormonet kanë rënë ose se rreziku për sëmundje kardiovaskulare është rritur, pasi diçka po pengon ereksionin natyral”, tha ai.

Shenja të tjera të testosteronit të ulët

Dr. Foster rekomandon që burrat, duke filluar nga mosha 30-vjeçare, të monitorojnë nivelet e testosteronit, pasi ato japin informacion të rëndësishëm për shëndetin aktual dhe atë afatgjatë.

Përveç mungesës së ereksioneve të mëngjesit, shenja të tjera të testosteronit të ulët mund të jenë:

vështirësi për të fituar masë muskulore edhe gjatë ushtrimeve

shtim në peshë dhe humbje e masës muskulore

ngadalësim i metabolizmit

ndryshime të humorit

rritje e ankthit

rrezik më i lartë për depresion.

Pse ndodh ereksioni i mëngjesit?

Ekspertja e shëndetit seksual, Sarah Mulindwa, shpjegon se ereksioni i mëngjesit nuk lidhet domosdoshmërisht me zgjimin seksual, shkruan Metro, transmeton Klankosova.tv.

Sipas saj, ai ndodh kryesisht gjatë fazës REM të gjumit, kur organizmi kalon në një gjendje rikuperimi dhe aktivizohet sistemi nervor parasimpatik.

Ky sistem kontrollon funksione automatike të trupit, si frymëmarrjen, ritmin e zemrës dhe funksionin seksual.

“Në këtë fazë trupi nuk e pengon në mënyrë aktive ereksionin dhe, meqë shumica e njerëzve zgjohen gjatë gjumit REM, është e zakonshme të zgjohen me ereksion”, shpjegon ajo.

Ekspertët theksojnë se, edhe pse është normale që frekuenca e ereksioneve të mëngjesit të ulet me kalimin e moshës, mungesa e tyre për një periudhë të gjatë nuk duhet të neglizhohet, pasi mund të jetë një sinjal i hershëm i problemeve hormonale ose të zemrës.