Humbi 45 kg, historia e suedezit që udhëtoi në anën tjetër të botës për kampin e dobësimit

Andre Helgesen udhëtoi deri në Kinë për të humbur kilogramët e fundit pas një humbjeje prej 45 kg, por përvoja në kampin e dobësimit ishte ndryshe nga ajo që kishte imagjinuar.

Një burrë nga Suedia vendosi të udhëtonte në anën tjetër të botës për të marrë pjesë në një nga kampet e njohura të Kinës për humbje peshe, ku pjesëmarrësit ndihmohen të humbin kilogramët e tepërt.

Andre Helgesen, nga Suedia, la punën e tij si teknik sistemesh për të nisur një udhëtim me çantë shpine nëpër Azi. Ndryshe nga shumë udhëtarë që zgjedhin destinacione si Tajlanda, Vietnami apo Indonezia, një nga ndalesat e para të tij ishte një kamp për humbje peshe në Kinë.

Helgesen kishte mësuar fillimisht për këto kampe përmes Reddit-it dhe tha se kjo e kishte frymëzuar të provonte një përvojë të ngjashme.

“Po planifikoja të shkoja në Kinë dhe doja të humbisja edhe disa kilogramë, ndaj mendova se do të ishte fundi i përsosur i rrugëtimit tim për humbje peshe”, tha ai.

Para nisjes së udhëtimit, ai kishte humbur tashmë rreth 50 kilogramë, duke zbritur nga mbi 133 kilogramë në rreth 83 kilogramë. Megjithatë, ai ende konsiderohej mbipeshë dhe dëshironte të humbiste edhe disa kilogramë të tjerë.

Për këtë arsye, ai vendosi të regjistrohej në Jianfeidaren në Shenzhen, një kamp i njohur në Kinë për humbje peshe dhe fitnes.

Kampi funksionon me model të mbyllur dhe ofron programe intensive stërvitjeje, ekzaminime spitalore, këshillim për ushqyerjen dhe mbështetje psikologjike për pjesëmarrësit.

Megjithatë, Helgesen u befasua kur kuptoi se procesi i humbjes së peshës nuk ishte shumë ndryshe nga ai që do të kishte ndjekur në vendin e tij.

“Është i njëjti kundërshtar si në shtëpi. Varet plotësisht nga ti nëse do të kesh sukses. Askush nuk më mbante për dore dhe nuk më tregonte çfarë të bëja 24 orë në ditë. Ishte përgjegjësia ime t’i përmbahesha planit dhe ta realizoja atë”, tha ai.

Ai shtoi se kampi u siguronte pjesëmarrësve orarin dhe vaktet, por se gjithsesi secili mund të zgjidhte nëse do t’i ndiqte ose jo.

“Edhe atje, ashtu si në shtëpi, gjithçka varet nga përgjegjësia personale”, u shpreh Helgesen.

Pjesëmarrësit kishin edhe trajnerë personalë, të cilët jo vetëm i udhëzonin, por shpesh kryenin ushtrimet së bashku me ta.

“Ata vuajnë, ne vuajmë”, tha ai me humor, duke vlerësuar gjithashtu sjelljen e trajnerëve, të cilët, sipas tij, ishin shumë të sjellshëm, argëtues dhe të gatshëm për të ndihmuar, pavarësisht pengesës së gjuhës.

Gjatë programit katërjavor, pjesëmarrësit inkurajoheshin të stërviteshin tri herë në ditë dhe të mbanin një deficit prej rreth 1,000 kalorish në ushqim. Me ushtrimet fizike, deficiti ditor arrinte në rreth 1,500 kalori, ndërsa Helgesen tha se konsumonte mesatarisht rreth 1,300 kalori në ditë.

Megjithatë, ai pranoi se përvoja nuk ishte pa sfida, pasi vendosi t’i përkushtohej plotësisht programit. /Klankosova.tv