Kombëtarja e Uruguajit anulon fluturimin grupor të ekipit pas eliminimit në Botëror

Eliminimi i Uruguajit në fazën e grupeve të Kampionatit Botëror 2026 ka sjellë pasoja të menjëhershme si në aspektin sportiv, ashtu edhe në organizimin institucional të Federatës Uruguaiane të Futbollit (AUF).

Sipas raportimeve nga mediat ndërkombëtare, pas konfirmimit të eliminimit të skuadrës  nga Botërori, federata ka vendosur të anulojë fluturimin charter të rezervuar për kthimin e përbashkët të ekipit në Montevideo, një vendim që reflekton zhgënjimin e madh për paraqitjen në këtë Botëror, transmeton Klankosova.tv.

Si pasojë, futbollistët nuk do të udhëtojnë më si grup. Ata do të kthehen individualisht me linja komerciale drejt destinacioneve të ndryshme, ku një pjesë e tyre do t’u bashkohet menjëherë klubeve përkatëse, ndërsa të tjerët pritet të ndalen fillimisht në Uruguaj për disa ditë pushimi para rikthimit në aktivitet.

Rrugëtimi i Uruguajit në Botëror u mbyll me humbjen ndaj Spanjës në ndeshjen vendimtare të grupit, duke e lënë skuadrën dy herë kampione bote jashtë fazës së eliminimit direkt.

Eliminimi ka shkaktuar zhgënjim të madh te lojtarët, stafi teknik dhe drejtuesit e federatës, ndërsa në ditët në vijim pritet një analizë e detajuar e paraqitjes së skuadrës për të identifikuar shkaqet e dështimit dhe për të përcaktuar drejtimin e ardhshëm të projektit sportiv nën drejtimin e Marcelo Bielsës.