Studentja amerikane vdes në Tesla, familja e padit: Ajo nuk mundi ta hapte derën

Prindërit e një studenteje që vdiq tragjikisht në një automjet Tesla kanë ngritur një padi kundër kompanisë, duke pretenduar se aksidenti u shkaktua nga një defekt i njohur në dizajnin e Cybertruck.

Ata pretendojnë se vajza e tyre nuk ishte në gjendje të dilte nga automjeti, i cili u përfshi nga flakët pas përplasjes, raporton Unilad, transmeton Klankosova.tv

Nëntorin e kaluar, 19-vjeçarja Krysta Tsukahara, 20-vjeçari Jack Nelson dhe shoferi 19-vjeçar Soren Dixon humbën jetën në aksident,

Raportet e medias thanë se Cybertruck, në pronësi të familjes Dixon, goditi një pemë në Piedmont të Kalifornisë.

Pothuajse një vit pas aksidentit, Carl dhe Noelle Tsukahara, prindërit e studentes së ndjerë, ngritën një padi. Dokumenti prej 36 faqesh, i paraqitur në Gjykatën e Lartë të Qarkut Alameda, pretendon se dizajni i derës së Teslës e bëri të pamundur që Krysta të dilte nga automjeti, edhe pse ajo nuk pësoi lëndime kërcënuese për jetën në vetë aksidentin.

Sipas padisë, studentja pësoi lëndime të lehta në aksident, por vdiq nga djegiet dhe thithja e tymit kur bateria e Cybertruck u përfshi nga flakët.

Padia pretendon se makina nuk kishte një mekanizëm funksional dhe të aksesueshëm për hapjen e derës emergjente.

“Nuk kishte asnjë mekanizëm funksional dhe të aksesueshëm për mbylljen manuale ose për hapjen e derës emergjente me anë të të cilit ajo mund të ishte arratisur. Vdekja e saj mund të ishte parandaluar”, thuhet në padi.

Akuzat shkojnë një hap më tej, duke sugjeruar se Tesla është në dijeni të një të mete të rrezikshme në dizajnin e automjeteve të saj.

“Tesla e di që kjo ka ndodhur dhe do të vazhdojë të ndodhë, dhe ata nuk po bëjnë gjë tjetër veçse shesin një makinë me një sistem që i bllokon njerëzit dhe nuk u jep atyre rrugëdalje”, tha familja e studentit të ndjerë. /Klankosova.tv