Aktorja e njohur e “Star Trek”, Nichelle Nichols, vdes në moshën 89 vjeçare

Aktorja amerikane Nichelle Nichols, e njohur më së shumti për rolin e saj në serialin televiziv sci-fi të viteve 1960 “Star Trek”, ka vdekur në moshën 89-vjeçare.

Nichols theu barrierat në rolin e saj si togere Nyota Uhura në serial, duke u bërë një nga aktoret e para me ngjyrë në SHBA që luante një figurë me autoritet, shkruan BBC, transmeton Klankosova.tv.

Ajo u punësua më vonë nga NASA në një përpjekje për të inkurajuar më shumë gra dhe afrikano-amerikanë që të bëhen astronautë.

Ajo vdiq të shtunën mbrëma, tha djali i saj Kyle Johnson.

Në një deklaratë të postuar në Facebook, Johnson shkroi: “Me keqardhje ju informoj se një dritë e madhe në qiell nuk shkëlqen më për ne, siç ka bërë për kaq shumë vite”.

“Drita e saj sidoqoftë, si galaktikat e lashta që shihen tani për herë të parë, do të mbetet që ne dhe brezat e ardhshëm ta shijojmë, të mësojmë dhe të marrim frymëzim.”

Seriali televiziv “Star Trek” shkatërroi stereotipet në vitet 1960 duke vendosur aktorë me ngjyrë dhe minoritarë në rolet kryesore.