1 milion ukrainas pa ngrohje dhe ujë pas sulmeve ruse

Sulmet ruse i lanë rajonet juglindore të Ukrainës, Dnipropetrovsk dhe Zaporizhzhia, pothuajse tërësisht pa energji, tha ministria e energjisë e vendit të mërkurën në mbrëmje.

Infrastruktura kritike “po funksiononte me energji rezervë”, shtoi ministria në një deklaratë në Telegram, ndërsa zyrtarët thanë se furnizimi me ujë dhe interneti ishin gjithashtu të ndërprera, raporton BBC, transmeton Klankosova.tv.

Rusia kohët e fundit ka intensifikuar sulmet ndaj infrastrukturës energjetike të Ukrainës, me qëllim paralizimin e furnizimit me energji gjatë një dimri të ashpër.

“Sistemi energjetik i Ukrainës është nën sulme armike çdo ditë dhe punonjësit e energjisë po punojnë në kushte jashtëzakonisht të vështira për t’u siguruar njerëzve dritë dhe ngrohje”, shkroi kryeministrja e Ukrainës, Yulia Svyrydenko, në Telegram.