Turizmi kosovar promovohet në Francë

 Ministria e Tregtisë dhe Industrisë përkatësisht Agjencia për Investime dhe Përkrahjen e Ndërmarrjeve në Kosovë (KIESA),  në kuadër të promovimit të turizmit dhe vlerave turistike që ofron vendi ynë, së bashku me operatorë turistikë vendor janë duke marrë pjesë në panairin e turizmit “Destination Nature”,  i cili po mbahet në Paris të Francës.

Prezantimi i bukurive natyrore, vlerave kulturore  si dhe aktiviteteve të ndryshme si:  ecje e hiking kanë zgjuar vëmendjen e shumë vizitorëve të cilët kanë ndaluar te shtandi i Kosovës në panair.

Interesim  për vendin tonë gjatë këtij panairi  është i konsiderueshëm  edhe nga ana e operatorëve turistikë të cilët po shfaqin një interes të veçantë për vendin tonë si destinacion turistik.

Panairi “Destination Nature”,  është një prej panaireve më të rëndësishme në fushën e turizmit në veçanti të udhëtimit dhe aktiviteteve në natyrë.

Në shtandin e Kosovës së bashku me përfaqësuesit e KIESA-s, ofertat turistike po i promovojnë këta tur operatorë: “Altavia”, “ Traveks”, “BNA” dhe “Catun”.

Në kuadër të panairit do të bëhet edhe promovimi i guidës turistike për Kosovën të Petit Fute, në gjuhën frënge.

Panairi i Turizmit “Destination Nature” mbahet në kryeqytetin francez, Paris nga data 17 – 20 Mars 2016, transmeton Klan Kosova.